له‌جیاتی بڕینی ده‌ستی خه‌ڵك، ده‌ستی گرانی، بێكاری‌و ناعه‌داڵه‌تی ببڕن!

نا بۆ توندوتیژی، به‌ڵێ بۆ عه‌داڵه‌تی كۆمه‌ڵایه‌تی!

ئێمه‌ قسه‌كانی به‌ڕێز فازل میرانی ره‌تده‌كه‌ینه‌وه‌و پێمان وایه‌ زۆر دوورن له‌ فكرو ره‌فتاری دیموكراتییانه‌و سه‌لماندی كه‌ شایانی حوكمڕِانی و به‌رپرسیارییه‌تی نییه‌. ئه‌گه‌ر به‌ڕێزی ده‌سه‌ڵاتی حكومه‌تێكی ئۆروپی به‌ده‌سته‌وه‌ بوایه‌ ئه‌وا هه‌موو رۆژێك ده‌یان كه‌س ده‌بوون به‌ قوربانی، به‌ڵام وه‌ك ده‌بینین و ده‌زانین هه‌فته‌ نییه‌ له‌ وڵاته‌ ئۆروپییه‌كان ناڕه‌زایه‌تی توندوتیژ، دژ به‌ حزب و لایه‌نه‌ فاشیسته‌كان یان دژ به‌ جه‌نگ، گرانی، بێكاری یان یادی یه‌كی ئایار ئه‌نجام نه‌درێ كه‌ تێیاندا مۆلۆتۆف كۆكتێل، به‌رد و دار به‌كارده‌هێنرێت، به‌ڵام زۆر زۆر به‌ده‌گمه‌ن خۆپیشانده‌رێك كوژراوه‌. نموونه‌(خۆپیشاندانه‌ توندوتیژه‌كانی فه‌ره‌نسا، یونان، سوید، ده‌نیمارك، ئه‌ڵمانیا، ئیتالیا و ئه‌سپانیا).
فازڵ میرانی به‌هۆی بۆچوونه‌كانی، به‌رپرسه‌ له‌ به‌هێزكردنی گیانی عه‌سكه‌ریتاری و ره‌وایه‌تی به‌ چه‌ك به‌كارهێنان ده‌دا وبه‌مه‌ گیانی خه‌ڵك به‌ هه‌رزان ده‌زانێ.
ده‌بێ كاك فازڵ بزانێ كه‌ زۆربه‌ی حكومه‌ته‌كان دژ به‌ خۆپیشاندانه‌ توندوتیژه‌كان گازی فرمێسك رژ، ئاوڕژ و كێبڵ به‌كارده‌هێنن.
كاك فازڵ و به‌رپرسه‌كانیتری حزب و حكومه‌ت و لایه‌نه‌كان هۆی سه‌ره‌كی ناڕه‌زایه‌تییه‌كانیان له‌بیركردووه‌ و باسی ئه‌وه‌ ناكه‌ن كه‌ خه‌ڵكی كوردستان داخوازی هه‌یه‌. ئێمه‌ داوا ده‌كه‌ین و ده‌ڵێین با له‌جیاتی گێره‌شێوێنی، گرژكردنی بارودۆخه‌كه‌و موزایه‌ده‌كردن به‌سه‌ر یه‌ك، به‌ عه‌قل و هوشیاری و حیكمه‌ته‌وه‌ چاو له‌ ناعه‌داڵه‌تییه‌كان بكه‌ن و چاره‌سه‌ری بكه‌ن.
ئێمه‌ له‌كاتێكدا به‌هه‌موو شێوه‌یه‌ك دژ به‌ به‌كارهێنانی توندوتیژین و خۆپیشاندانه‌كه‌مان له‌ كاتژمێری 3.45كۆتایی پێهێنا و به‌هیچ شێوه‌یه‌ك به‌رپرسیار نین له‌ رووداوه‌كانی پاش ئه‌و كاتژمێره‌.
ئێمه‌ داواده‌كه‌ین:
1-حكومه‌تی هه‌رێمی كوردستان داخوازییه‌كانی جه‌ماوه‌ر جێبه‌جێ بكات.
2-به‌رپرسان له‌ كوشتن و برینداركردنی خۆپیشانده‌ران و سوتاندنی باره‌گاكانی گۆڕان دادگایی بكرێن.
3-پارتی دیموكراتی كوردستان داوای لێبووردن بكات بۆ بۆچوونه‌ نابه‌جێكانی فازڵ میرانی.
تۆڕی به‌رگری له‌ماف‌و ئازادیه‌كانی خه‌ڵك
19/2/2011